10يوليو

القصة مش تجربة وبسّ !

بلاش تدخل مجال مو مجالك عشان إنت (متخيّل) أو (متوقع) إنه سهل ، وإنه (يالله بجرب وبشوف شو بصير معي) 🙂

أشهر مثالين بهالموضوع جماعة الجرافيك ديزاين ، وجماعة السوشال ميديا .. المجالين هدول بس تشوفهم (من بعيد) بتحس إنه الأساس تبعهم سهل .. وهييييه يعني برافو يعني وداعاً للأشياء الصعبة خلص لقيت الإشي السهل الحلو اللي بجيب مصاري ! يعني بتقنع حالك إنك رح تتعلم شوي برامج تصميم وهيك حتصير خبير ومصمم جرافيك .. ورح تتعلم كيف تدير صفحة عالفيسبوك وتنزل أكمن بوست يعجبوا الناس فخلص إنت هيك صرت فلتة السوشال ميديا نمبر ون في الكوكب 🙂

شوف .. أولاً في منطق لازم لازم لازم تفهمه منيح بخصوص السوق : الإشي اللي بكون سهل الدخول، بكون صعب المنافسة 🙂 يعني لو المجال اللي إنت فايتو سهل عالناس وهاد سبب كافي من وجهة نظرك، إعرف إنه في ناس كثير رح تدخله ويفكروا زيك، والمعروض رح يكون كتير في السوق وسعرك رح يقل .. وبالتالي مش رح يبقى إلك قيمه حقيقية مع الوقت !

ثانياً .. مين بالزبط اللي حكالك إنه هاي المجالات سهلة ؟!
الجرافيك ديزاينر لازم يكون فنان ، وفاهم في الألوان ، وعنده ذوق وحسن اختيار وتنسيق وإبداع ، ولازم يكون شايف أمثلة كثيـــــــــــــــرة جداً في العالم عشان يمتص الشغلة صح .. مش أي واحد بعرف يشتغل عالفوتوشوب صار مصمم !! ونفس الكلام عالسوشال ميديا .. لازم تدرس أشياء كثيرة زي فن الكتابة بشكل عام ، ومهارات التواصل ، وشوية برمجة ، وتدرس وتفهم الاستراتيجيات ، وتحلل الناس والجمهور ، وتعرف تستخدم كل الأدوات ، وبرضه تشوف أمثلة كثير جداً !

عشان تنجح في إشي لازم تتأكد إنها مناسبة لإمكانياتك ..
الفيل لو شد حالو وأخذ دروس خصوصية بشكل هائل ما رح يعرف يطير !
وإذا واحد بعشق الركض ولكن رجليه مقطوعين بسبب حادث سير ، أكيد ما رح يفوز !

تأكد إنه الإشي مناسب لإمكانياتك ، وبعدين اعطيه كل تركيزك ومجهودك ، عشان تقدر تبدع وتتميز فيها.. أما إنك تشوف إشي من بعيد سهل ، وتشتغل فيه (لأنه سهل) وحيجيبلك فلوس ، فهيك إنت مش فاهم القانون الكوني العالمي : ما في إشي سهل 🙂 ولو لقيت إشي سهل فاعرف إنك غالباً بتعمله غلط 🙂

#منقول_بتصرف

شارك التدوينة !

عن hasan

اضف رد

لن يتم نشر البريد الإلكتروني . الحقول المطلوبة مشار لها بـ *

*

© Copyright 2016, All Rights Reserved